Detaje të reja janë zbuluar në lidhje me ngjarjen e rëndë të ndodhur në fshatin Bodrisht të Dropullit, ku çifti i bashkëshortëve Kosta Ilia, 84-vjeç dhe Kleoniqi Ilia 88-vjeçe, u gjetën të pajetë dhe të dhunuar brenda banesës së tyre.
Korrenspondenti i Euronews Albania, Blerin Kore, bën me dije se pistat që po heton policia janë ato të krimit në familje apo një tentative grabitjeje.
Sipas policisë në trupin e viktimave janë konstatuar dhenja dhune që dyshohet se janë shkaktuar nga goditjet me sende të forta. Në shtëpinë e të moshuarve nuk janë gjetur dëmtime të xhamave, apo dyerve.
Çifti i të moshuarve nuk kishin fëmijë, ndërkohë që u gjetën të pajetë nga fqinjët mëngjesin e të enjtes. Ishte motra e të ndjerit nga Athina ajo e cila vuri në lëvizje fqinjët pasi nuk mund të lidhej dot në telefon me çiftin e të moshuarve.
“Sipas policisë dyshohet se janë goditur me mjete rrethanore ç’ka ka shkaktuar vdekjen e tyre. Personat janë gjetur të pajetë në brendësi të banesës. Ndërkohë që policia vijon hetimet, dyshohet për disa pista ngjarjesh.
Policia është shprehur për një krim në familje fillimisht, dyshohet gjithashtu dhe për një tentativë grabitjeje.
Megjithatë policia thekson faktin se banesa nuk është e dëmtuar, shqyerje të dyerve apo dritareve, ndërkohë që edhe orenditë kanë qenë të rregullta që do të thotë se nuk ka pasur kërkime për të holla që çifti mund të ketë patur në banesë.
Të dy të moshuarit jetonin vetëm, ata ishin një çift që nuk kishin fëmijë. Kanë qenë fqinjët e tyre që kanë konstatuar vrasjen.
Unë komunikova me fqinjët, ka qenë motra e të moshuarit e cila jeton në Athinë, e cila ka tentuar të komunikojë përmes telefonit, por i vëllai dhe gruaja e tij nuk përgjigjeshin. Atëherë ajo ka njoftuar banorët e saj dhe kjo ka vënë në lëvizje fqinjët të cilët kanë shkuar në banesë”, tha Kore.