Vizita e presidentit të Ukrainës, Volodymyr Zelensky në Tiranë, ku do të marrë pjesë në samitin për Ukrainën, ka tërhequr gjerësisht vëmendjen e medias prestigjioze ndërkombëtare:
Associated Press
Presidenti i Ukrainës do të bashkorganizojë një samit me qeverinë e Shqipërisë që ka për qëllim të nxisë mbështetjen e mëtejshme për Kievin nga vendet e Evropës Juglindore, pasi shenjat e lodhjes po rriten dy vjet pas pushtimit të plotë të Rusisë.
Presidenti ukrainas, Volodymyr Zelenskyy mbërriti dje para mesnate në Tiranë, në ndalesën e fundit të një turi ndërkombëtar, përfshirë Arabinë Saudite, për të nxitur një plan paqeje dhe kthimin e të burgosurve të luftës nga Rusia.
Zelensky e konsideroi kryeministrin shqiptar Edi Rama “mikun e palëkundur të Ukrainës” në një mesazh në X duke shtuar se të dy “do të diskutojnë bashkëpunimin mbi mbrojtjen dhe politikën, mbështetjen për Formulën e Paqes dhe marrëveshjet e sigurisë”.
France 24
Zelensky ka udhëtuar cep më cep të globit javët e fundit për të marrë mbështetje për vendin e tij të rrethuar, ndërsa forcat e armatosura të Ukrainës po përballen me një mungesë të madhe municioni dhe po luftojnë për të frenuar përparimet ushtarake të Rusisë në terren.
Ai mbërriti në Shqipëri dje para mesnate dhe sot do të takohet në Tiranë me disa liderë nga i gjithë rajoni gjatë “Samitit Ukrainë-Evropa Juglindore” – vizita e tij e parë në vendin ballkanik që nga pushtimi i Rusisë në shkurt 2022.
Daily Mail
Presidenti ukrainas Volodymyr Zelensky mbërriti në Shqipëri, përpara një konference për sigurinë, vizita e tij e parë në vendin ballkanik që nga pushtimi i Rusisë.
Në një postim në rrjetet sociale, ministri i Jashtëm i Shqipërisë, Igli Hasani e quajti mbërritjen e liderit ukrainas në Tiranë ”një moment kyç për nxitjen e lidhjeve dypalëshe dhe për solidaritetin me Ukrainën në luftën e saj heroike kundër agresionit rus”.
Kjo është hera e parë që Zelensky bën një vizitë në vendin ballkanik që kur Rusia pushtoi Ukrainën më shumë se dy vjet më parë.
Kryeministri i Shqipërisë Edi Rama vizitoi Kievin, së bashku me kryeministrin e atëhershëm të Malit të Zi, Dritan Abazoviç, në qershor 2022.
Në Tiranë Zelensky do të takohet me disa liderë nga i gjithë rajoni gjatë “Samitit Ukrainë-Evropa Juglindore”.
Shqipëria, një ish-shtet satelit i Bashkimit Sovjetik dhe tani anëtare e NATO-s, ka mbështetur vazhdimisht Ukrainën në skenën botërore.
Ajo ka qenë një nga vendet e pakta në rajon që ka vendosur sanksione kundër Rusisë.
Kyiv Post
Presidenti ukrainas, Volodymyr Zelensky do të takohet sot në Tiranë me liderë nga Evropa Juglindore për të kërkuar mbështetje për Kievin, ndërsa Rusia po fiton në fushën e betejës dy vjet pasi pushtoi fqinjin e saj.
Zelensky ka udhëtuar shumë javët e fundit për të mbledhur mbështetje për vendin e tij të rrethuar, ndërsa forcat e armatosura të Ukrainës përballen me një mungesë municioni dhe luftojnë për të frenuar përparimet ushtarake të Rusisë në terren.
Para se të mbërrinte në Tiranë, Zelensky u ndal në Arabinë Saudite, ku kërkoi të promovonte planin e tij të paqes dhe të diskutonte shkëmbimet e mundshme të të burgosurve të luftës.
Vizita në Tiranë do të nisë si një takim dypalësh me Shqipërinë – por më pas do të përfshijë anëtarët aspirantë të BE-së në Ballkan, pjesëmarrjen online nga Turqia, si dhe presidenten e Komisionit Evropian, Ursula von der Leyen.
AFP
Në mes të një turneu ndërkombëtar, presidenti ukrainas Volodymyr Zelensky takohet sot në Tiranë me liderët e Evropës Juglindore për të kërkuar mbështetjen e tyre për vendin e tij, të cilit i mungojnë municionet, ndërsa Rusia po fiton terren në front, dy vjet pas fillimit të pushtimit.
Kreu i shtetit ukrainas mbërriti në kryeqytetin shqiptar, Tiranë, mbrëmjen e djeshme, pas një vizite në Arabinë Saudite.
Ai ka udhëtuar nëpër botë javët e fundit për të mbledhur mbështetje për Ukrainën, forcat e armatosura të së cilës po përballen me mungesë municionesh dhe armësh në luftën e tyre kundër përparimit të forcave ruse.
Pas një takimi me kryeministrin shqiptar Edi Rama, Zelensky pritet në një samit me liderët e vendeve të Europës Juglindore.
Ky është udhëtimi i tij i parë në këtë vend ballkanik që nga fillimi i pushtimit rus të Ukrainës në shkurt 2022.
“Unë jam duke punuar sot në Tiranë. Do të takoj një mik të palëkundur të Ukrainës, kryeministrin shqiptar Edi Rama”, shkruan Zelensky në X duke specifikuar se do të takojë edhe liderë të tjerë të rajonit në kuadër të këtij samiti.
ANSA
Presidenti ukrainas Volodymyr Zelensky ndodhet sot në Tiranë për të takuar liderët e vendeve të Evropës Juglindore, në një samit të organizuar së bashku me qeverinë shqiptare.
Dhe pikërisht me kryeministrin Edi Rama, Zelensky u takua mëngjesin e sotëm, para samitit.
”Me mikun e palëkundur të Ukrainës do të diskutojmë mbrojtjen dhe bashkëpunimin politik, mbështetjen për Planin e Paqes dhe marrëveshjet e sigurisë”, ka shkruar presidenti ukrainas në rrjetet sociale, ku do të ketë edhe takime dypalëshe me krerët e shteteve dhe kryeministrat e vendeve të pranishme.
Zelensky tha se dëshiron të propozojë ”mbështetje për përpjekjet e Ukrainës për të arritur një paqe të drejtë dhe të qëndrueshme si dhe për të organizuar samitin global për paqen në Zvicër”.
/f.s