Ndonëse reshjet e shiut dhe borës kanë pushuar, kjo ka shtuar intensitetin e prurjeve në liqenin e Fierzës duke ndikuar në përmirësimin e situatës hidrike në vend.
Vetëm ditët e fundit edhe prurjet e lumenjve në hidrocentralin e Fierzës kanë ndikuar në rritjen e nivelit të liqenit.
Ky nivel duket shenjë e mirë për KESH-in për sigurimin e rezervës ujore. Aktualisht hidrocentrali i Fierzës po punon me 2 turbina.
Nga ana tjetër ndotja e liqenit të Fierzës është një problem që haset prej kohësh.
Prurjet e shumta kanë sjellë me vete edhe tonelata mbeturinash që kanë mbushur sipërfaqen e liqenit.
Situata të tilla përsëriten sa herë që ka rënie apo ngritje të nivelit të ujit në liqenin e Fierzës.
Pas vlerësimit të situatës dhe pas një studimi thuajse 7 vjeçar, Kukësi dhe Gjirokastra janë dy qarqet përfituese për ndërtimin e landfilleve rajonale, të cilat do t’i japin zgjidhje këtij problemi.
Projekti në fjalë do të ndërtohet në Përbreg të njësisë administrative Tërthore, me një kapacitet prej 250 mijë metër kubësh e një jetëgjatësi 25 vjeçare.
Në ndihmë të tij do të jenë dy stacione transferimi në Has e Tropojë.
Puna për ndërtimin e landfillit do të nisë pranverën e vitit të ardhshëm e zbatohet përmes agjensisë franceze të zhvillimit.
/a.d