Sekretari i Përgjithshëm i NATO-s, Mark Rutte, do të vizitojë nesër kryeqytetin Turk, Ankaranë.
Mediat e huaja bëjnë me dije se sekretari i NATO-s do të takohet nesër me presidentin turk Rexhep Tajip Erdogan, Ministrin e Punëve të Jashtme Hakan Fidan dhe Ministrin e Mbrojtjes, Yasser Guler.
Gjatë takimeve të Rutte në Ankara, pala turke pritet të ngrejë praninë e grupimit kurd PYD dhe milicisë së Forcave Demokratike Siriane (SDF) të mbështetur nga SHBA.
Ankaraja e barazon praninë e forcave kurde në kufirin e saj jugor me organizatën PKK dhe terrorizmin.
Udhëheqja turke pritet gjithashtu të ngrejë me Sekretarin e Përgjithshëm çështjen e rolit të mundshëm ndërmjetësues të Turqisë në luftën Ukrainë-Rusi dhe çështje të tjera dypalëshe, veçanërisht në lidhje me ndryshimet e pritshme në marrëdhëniet transatlantike pas marrjes së pushtetit në SHBA nga Donald Trump.
Në kuadër të kontakteve të tij në kryeqytetin turk, Mark Rutte do të takohet edhe me përfaqësues të industrisë turke të mbrojtjes dhe do të vizitojë objektet e Industrisë Turke të Hapësirës Ajrore, të cilat së fundmi u vunë në shënjestër të një sulmi terrorist.
Para vizitës së tij në Turqi, Mark Rutte u takua të premten në Florida me presidentin e zgjedhur të SHBA-së, ndërsa ndalesa e radhës e sekretarit të përgjithshëm do të jetë Athina.