Bashkëpunimi për të ruajtur sistemin shumëpalësh të tregtisë me Organizatën Botërore të Tregtisë (OBT) në thelb është një prioritet i Kinës , theksoi të hënën zëdhënësi i Ministrisë së Punëve të Jashtme të Kinës Guo Jiakun.
Kina do të vijojë të respektojë angazhimet që ka marrë për anëtarësimin e saj në OBT, të nxisë liberalizimin dhe lehtësimin e tregtisë globale e të investimeve dhe të krijojë më shumë përfitime për botën, tha Guo në një konferencë shtypi në përgjigje të një pyetjeje lidhur me 30-vjetorin e themelimit të OBT-së.
Nëpërmjet krijimit të një mjedisi institucional të hapur, të qëndrueshëm e të parashikueshëm, OBT-ja ka bërë që tregtia globale të kryhet në mënyrë të qëndrueshme e të rregullt në përgjithësi dhe bashkëpunimi tregtar dhe ekonomik midis anëtarëve të saj të zgjerohet.
OBT-ja ka mbështetur pjesëmarrjen dhe përfitimin prej globalizimit ekonomik nga ekonomitë në zhvillim dhe ka dhënë kontribut të rëndësishëm në përmirësimin e mirëqenies së popujve të vendeve të ndryshme dhe në nxitjen e zhvillimit të qëndrueshëm, shtoi ai.
Duke theksuar se tregtia e lirë është një kusht thelbësor për rritjen e ekonomisë botërore, zëdhënësi tha se qëllimi përfundimtar i tregtisë së lirë është të arrihen leverdia e ndërsjellë dhe zhvillimi i përbashkët.