Një rrjet radarësh kinezë me sensorim në distancë për përdorim komercial, i përbërë nga 12 satelitë, filloi funksionimin ditët e fundit, sipas PIESAT, një firmë satelitësh me seli në Pekin.
Njoftimi erdhi pasi katër satelitët PIESAT-2, të cilët u lëshuan javën e kaluar dhe hynë në një orbitë sinkrone diellore prej 528 km, transmetuan me sukses në Tokë të dhëna dhe imazhe me qartësi të lartë.
Satelitët e fundit, të cilët iu bashkuan tetë satelitëve të vendosur më parë në hapësirë, krijuan kështu Nuwa, plejadën më të madhe komerciale të radarëve me sensorë në distancë, e emëruar pas perëndeshës kineze të njohur si krijuesja e njerëzimit.
Satelitët Nuwa janë të organizuar në tre grupe. Grupi i parë formon një konfigurim të ngjashëm me rrotën, me një satelit kryesor që vepron si “qendër”, i rrethuar nga tre satelitë ndihmës, të shpërndarë në mënyrë të barabartë. Grupi i dytë dhe i tretë u nisën gjatë dy muajve të fundit dhe janë të organizuar në formacione katër-satelitore, bashkë-orbitale, të ngjashme me rrotat.
Konstelacioni tani është në gjendje të ofrojë mbulim global, duke përfshirë mbulimin në rajonet polare dhe ekuatoriale. Ai mund të shohë përmes reve dhe shiut, duke mundësuar kështu vëzhgimin konstant të tokës gjatë gjithë motit, me një rezolucion imazhi deri në 1 metër.
“Satelitët kanë sensorë distance në kohë reale, me reagim të shpejtë dhe aftësi vëzhgimi të shkathët,” tha Wang Yuxiang, kryetar i PIESAT. “Atyre u duhen vetëm 20 minuta për të transmetuar të dhënat, nga komanda në aparatet marrëse tokësore.”
Pritet që deri në vitin 2025, konstelacioni Nuwa do të ketë një rrjet prej të paktën 20 satelitësh, për të mundësuar një interval rivizitimi, me kohë të reduktuar në një orë.
PIESAT ka përdorur gjithashtu inteligjencën artificiale, për të rritur efikasitetin e analizës së imazhit, duke realizuar monitorimin në kohë reale të deformimeve në shkallë milimetrike, në objekte si digat apo daljet e kullimit.