Presidenti rus Vladimir Putin tha se ndan një botëkuptim “shumë të afërt” me homologun e tij iranian Masoud Pezeshkian, ndërsa liderët mbajtën një takim inaugurues miqësor, pikërisht në kohën kur Lindja e Mesme përgatitet për përgjigjen e Izraelit ndaj sulmit më të madh raketor të Teheranit javën e kaluar. Takimi në një samit rajonal në Ashgabat, në Turkmenistan, vjen gjithashtu kundër një sfondi të lidhjeve më të ngushta ushtarake midis Iranit dhe ushtrisë ruse në vitet e fundit, veçanërisht që nga pushtimi i Ukrainës në shkurt 2022.
“Ne jemi duke punuar në mënyrë aktive së bashku në arenën ndërkombëtare dhe vlerësimet tona për ngjarjet që ndodhin në botë janë shpesh shumë të afërta”, tha Putin.
Irani ka furnizuar Rusinë me mijëra dronë sulmues “Shahed” dhe sipas zyrtarëve amerikanë, ka ndërtuar një fabrikë dronësh në Rusi. Irani gjithashtu kohët e fundit transferoi raketa balistike me rreze të shkurtër veprimi në Rusi për t’i përdorur në luftën kundër Ukrainës, raportoi CNN duke shënuar një përshkallëzim të rëndësishëm në mbështetjen e vendit për Moskën.
“Ekonomikisht dhe kulturalisht, komunikimet tona po forcohen dita ditës dhe po bëhen më të fuqishme. Tendenca në rritje e bashkëpunimit ndërmjet Iranit dhe Rusisë, duke marrë parasysh vullnetin e liderëve të lartë të të dy vendeve, duhet të përshpejtohet për të forcuar këto lidhje”, tha Pezeshkian.
Shtetet e Bashkuara i shohin me shqetësim marrëdhëniet në rritje të Moskës me Teheranin. Ajo ka akuzuar Iranin për furnizimin e Rusisë me raketa balistike për përdorim në konfliktin në Ukrainë, diçka që Teherani e ka mohuar. Ndërkohë Rusia mbështeti “diskutimin më të gjerë të mundshëm ndërkombëtar” për botën shumëpolare në zhvillim dhe ishte e hapur për ta diskutuar atë në forume të ndryshme, duke përfshirë Komonuelthin e Shteteve të Pavarura, Bashkimin Ekonomik Euroaziatik, Organizatën e Bashkëpunimit të Shangait dhe BRICS, tha Putin.