Senatori amerikan, Robert Menendez është shpallur fajtor nga një juri në SHBA pasi akuzohet se ka marrë ryshfet nga dy biznesmenë të Nju Xhersit në këmbim të gatishmërisë së senatorit për të përdorur ndikimin e tij politik në emër të tyre.
Menendez u shpall fajtor pas provave që FBI gjeti në shtëpinë e tij ku u zbulua ar dhe para të thata.
Bashkë me Menendezin u dënuan edhe dy biznesmenët, Ëael Hana dhe Fred Daibes. Ata nuk e mohuan se i kishin dhënë zotit Menendez dhe gruas së tij, Nadine Menendez, sende me vlerë, por ata argumentuan në gjyq se sendet ishin hua apo “dhurata të vullnetit të mirë” nisur nga marrëdhënia që kishin me senatorin.
Hana, një biznesmen egjiptiano-amerikan, kishte qenë miqësor me zonjën Menendez për vite me radhë përpara se ajo të fillonte të njihej dhe martohej me senatorin.
Në fillim të vitit 2018, Hana dhe znj. Menendez filluan të organizojnë takime mes z. Menendez dhe zyrtarëve egjiptianë.
Qeveria e Egjiptit certifikoi një kompani të mishit hallall, e themeluar nga z.Hana, “IS EG Halal”, një monopol fitimprurës, për të cilin prokurorët thonë se u përdor për t’i dhënë ryshfet senatorit dhe gruas së tij.
Hana u gjet fajtor pasi i dha zonjës Menendez i mundësoi pagesën e hipotekës së shtëpisë në këmbim të ndihmës së senatorit për të mbrojtur monopolin e tij në biznes.
Njëmbëdhjetë shufra ari, të blera nga Hana dhe me vlerë afërsisht 12 mijë dollarë, u zbuluan gjithashtu gjatë një kontrolli në shtëpinë e senatorit.
Biznesmeni tjetër, z. Daibes, sipërmarrës i pasurive të paluajtshme në Nju Xhersi, ishte mik i ngushtë i senatorit Menendez për vite me radhë.
Dy nga shufrat e arit, secila nga një kilogram që agjentët e FBI-së i gjetën në dollapin e shtëpisë së senatorit ishin të stampuar me numra serialë të lidhur me z. Daibes, i cili, siç tregoi më pas në dëshminë e tij, e kishte blerë arin si investim.
Zarfet e mbushura me 10 mijë dollarë para të gatshme të mbështjella me shirita bankarë mbanin gjithashtu gjurmët e gishtave të zotit Daibes dhe karakteristika të tjera identifikuese, shkruan New York Times.
Prokurorët thanë se z. Daibes i dha zotit Menendez dhe gruas së tij shufrat e arit dhe paratë në këmbim të ndihmës së senatorit për disa çështje: përpjekje për të zgjidhur një rast mashtrimi me bankat federale në Nju Xhersi; përkrahjen e biznesit hallall; dhe lidhjen e zotit Daibes me një fond investimi nga Katari që siguroi 95 milionë dollarë financim për të nisur një sipërmarrje të pasurive të paluajtshme në Edgewater, N.J.
Në një deklaratë përmbyllëse, Larry S. Lustberg, avokati i zotit Hana, tha se prokurorët nuk kishin arritur të provonin çështjet që sipas tyre ishin ngritur kryesisht në spekulime.
César de Castro, avokati i zotit Daibes, nuk thirri asnjë dëshmitar të vetëm pasi gjykatësi përjashtoi dëshminë nga bashkëpunëtorët e zotit Daibes.
“Ky rast ka të bëjë me supozime, hamendje, paragjykime, supozime, dyshime, supozime dhe konkluzione të padrejta”, tha zoti de Castro para jurisë.
Juria i dënoi të tre personat për të gjitha akuzat kundër tyre.