Britani e Madhe-Ministrja kundër korrupsionit në Britaninë e Madhe, Tulip Siddiq ishte nën presion për të dhënë dorëheqjen dje (4 janar), pasi u zbulua se ajo kishte gënjyer për marrjen e një apartamenti në Londër si dhuratë.
E pyetur nëse asaj i është dhënë apartamenti me dy dhoma gjumi, tani me vlerë 700,000 £, më parë në pronësi të një ndërtuesi pronash të lidhur me tezen e saj diktatore nga Bangladeshi, ajo ka mohuar se ishte një dhuratë.
Siddiq ka insistuar se prindërit e saj ia kishin blerë atë. Por, burimet laburiste kanë konfirmuar se apartamenti iu dha asaj si një “akt mirënjohjeje”.
42-vjeçarja roli i së cilës është të ulë korrupsionin në sektorin financiar të Britanisë, është nën hetim në vendlindjen e saj, Bangladesh, ku ajo dhe katër anëtarë të familjes akuzohen për përvetësim të 3.9 miliardë paundëve nga një termocentral bërthamor, sipas Daily Mail.
Deputetët konservatorë kërkuan që ajo të tërhiqej nga posti i ministres së Thesarit nëse ajo nuk shpjegon situatën.
‘Zonja Siddiq duhet të sqarojë pozicionin në lidhje me pronën. Nëse nuk e bën, pozita e saj si ministre është e paqëndrueshme’, tha Bob Blackman, deputeti konservator.
Akuzat e kësaj natyre kundër çdo anëtari të qeverisë janë të papranueshme, por janë edhe më të diskutueshme kur ministri është ministri anti-korrupsion i Starmer”, tha deputeti Matt Vickers.
‘Ky informacion i ri për Tulip Siddiq është shqetësues’, tha Ben Obese-Jecty, deputeti konservator.