Ish-kryeministri Sali Berisha u bëri thirrje shqiptarëve që të ngrihen dhe të rrëzojnë qeverinë dhe Edi Ramën. Në fjalën e tij nga “arresti i shtëpisë”, Berisha tha se qytetarët duhet të ngrihen për të kërkuar drejtësi për dinjitetin e tyre. Ai u shpreh se qytetarët “nuk duhet të presin që Edi Ramën ta ndëshkojë SPAK”.
“Shqiptarë ngrihuni, të mos mbajmë trupin në Tiranë sepse nuk ka komb të qytetëruar që do pranonte një horr të tillë për kryeministër.
Rama i ka kohërat e numëruara, por ftoj shqiptarët ti presin biletën dhe të shikoni si do bjerë llumi që e mban në këmbë atë.
Për dinjitetin tuaj ngrihuni në këmbë dhe kërkoni drejtësi për dinjitetin tuaj. Mos prisni që Edi Ramën ta ndëshkojë Dumani, ai është një skllav i tij i mjerë”, tha Berisha ne fjalen e tij.
Berisha u ndal edhe tek aksioni opozitar, i cili ka nisur prej muajit tetor. Sipas tij deputetët e opozitës nuk duan që të bllokojnë parlamentin, por kjo është një ‘klithma e mosbindjes civile për të mbrojtur parimet e shenjta të pluralizmit’.
“43 deputetë nisën një betejë pa kthim në parlament, një betejë për mbrojtjen e të drejtave tuaja kushtetuese. Një betejë për mbrojtjen e pluralizmit parlamentar. Kjo betejë nisi në mënyrën më të pazakonte. Me mjetet e mosbindjes civile të përpara deri në atë kohë, grumbuj karrigesh, tymuese dhe zhurmuese për ti thënë parlamentit monist se mbi ne nuk kalon dot kurrë.
Kurse ju shihnit lakenjtë e qeverisë në studiot televizive që shfaqeshin të turpëruar me këto akte të opozitës dhe jo me monizmin e shëmtuar të Edi Ramës.
Deputetet nuk donin të bllokonin parlamentin , por ato ishin thirrja e fuqishme, klithma e mosbindjes civile për të mbrojtur parimet e shenjta të pluralizmit, për të mbrojtur ju dhe të drejtat tuaja”, tha ish kryeministri.
Ish-kryeministri Sali Berisha, ka deklaruar para mbështetësve se në rrugën e “Shpresës”, siç e etiketon ai rrugicën ku ndodhet banesa e tij, po përballet mbrojtja e interesit kombëtar të shqiptarëve, Edi Ramën.
Ai u shpreh se pa votë të lirë nuk mund të ketë dinjitet njerëzor apo kombëtar, ndërsa i quajti simpatizantët e tij luftëtarë e misionarë të të ardhmes së vendit.
“Në ‘rrugën e Shpresës’ në betejën tuaj janë burimet më kryesore të inkurajimit, të trimërimit, të shqiptarëve, të ndriçimit të mendjes dhe zemrave të tyre.
Në një kohë të shkurtër me qëndresën tuaj, guximin tuaj, ju u shndërruat në burimin më kryesor të shpresës së shqiptarëve, sepse ju po zhvilloni një betejë pa kthim, një betejë të drejtë.
Këtu në rrugën e shpresës përballet përpjekja e madhe e juaja për mbrojtjen e lirisë dhe pluralizmit me monizmin e shëmtuar, me armikun e egër të lirive dhe dinjitetit njerëzor.
Këtu në këtë rrugë përballet mbrojtja e interesit kombëtar të shqiptarëve, me armikun e egër të qenies së shqiptarëve, interesit të tyre kombëtar, me Edi Ramën, regjimin e tij që po përzënë shqiptarët çdo javë, muaj si një pushtim i egër nga vendi i tyre.
Këtu në këtë rrugë, në rrugën e Shpresës përballen çdo natë antikorrupsioni i njerëzve të ndershëm, që jetojnë me djersën e tyre, i njerëzve të guximshëm që vërsulen kundër hajdutëve të qeverisë me në krye Edi Ramën.
Përballet antikorrupsioni me korrupsionin më gjigant që sot ka Europa.
Përballet antikorrupsioni me me hajninë, vjedhjen më të madhe që u bëhet qytetarëve në Europë, qytetarëve shqiptarë nga Edi Rama.
Sot në rrugën e shpresës ju zhvilloni një betoj para së gjithash për dinjitetin tuaj, të shqiptarëve.
Pa votë të lirë nuk ka dinjitet njerëzor, nuk ka dinjitet kombëtar.
Me kauzën tuaj të drejtë, me idealet fisnike që mbroni, me vizionin kthjellët që keni, ju jeni luftëtarë, misionarë të të ardhshmes së Shqipërisë, të Shqipërisë së fitores, të Shqipërisë së shpresave të rinjve shqiptarë, ëndrrave të tyre të bukura”, u shpreh ai./m.j