Agjencia e Mbikëqyrjes Policore ka arrestuar dy punonjës në Komisariatin e Policisë së Rinasit, pasi dyshohen si të përfshirë në ‘Korrupsion pasiv i personave që ushtrojnë funksione publike’, kryer në bashkëpunim.
Bëhet me dije se në pranga kanë rënë shtetasit:
-Inspektor, Ardit Doçi 31 vjeç, me detyrë Kontrollor në Komisariatin e Policisë Aeroporti Rinas
-Inspektor ,Endri Beramaj 24 vjeç, me detyrë Kontrollor në Komisariatin e Policisë Rinas.
Arrestimi i këtyre dy punonjësve të policisë u bë, pasi gjatë veprimeve hetimore procedurale, të kryera për verifikimin e informacioneve mbi përfshirjen në veprime korruptive, u krijuan dyshime të arsyeshme, bazuar në prova se punonjësit e policisë, duke shfrytëzuar funksionin organik, kanë kërkuar dhe përfituar vlera monetare në formë rryshfeti, nga një shtetase që udhëtonte në dalje të territorit të Republikës së Shqipërisë.
