Detaje të rënda janë bërë të njohura nga tragjedia e dy motrave shqiptare në Xhenova të Italisë, ku njëra prej tyre humbi jetën pasi i hodh nga kati i katërt i një pallati, ndërsa tjetra pësoi dëmtime të rënda.
Sipas mediave italiane, mësohet se viktima, 32-vjeç, ka akuzuar para ngjarjes burrin e saj, me të cilin ishte në proces divorci, për lidhje me grupe ekstremiste.
“Nuk donte që unë të kisha një jetë shoqërore, ai shoqërohej me terroristë”, mësohet se ka thënë ajo, ndërsa dyshohet se sipas saj ai kishte bërë disa udhëtime të dyshimta në Zvicër dhe Arabinë Saudite, të cilat ai i kishte shpjeguar si vizita për të takuar miq të vjetër.
“Gruaja e akuzoi se kishte bërë udhëtime të dyshimta në Zvicër dhe Arabinë Saudite në shoqërinë e një shoku, por ato ishin udhëtime për të cilat ajo kishte dhënë pëlqimin dhe për të vizituar një mik të vjetër”, ka thënë avokati i burrit.
Denoncimet e 32-vjeçares shqiptare për abuzim dhe radikalizim ndaj të shoqit kanë çuar më tej hetimet, ndërsa burri i saj pretendon se këto ishin shpifje dhe xhelozi nga ana e saj.
“Të gjitha janë sharjet e saj, ajo ishte xheloze”, ka thënë ai sipas ilmessaggero.
E reja shqiptare, e cila jetonte në kushte të vështira dhe kishte katër fëmijë, mësohet se kishte frikë nga humbja e kujdestarisë së fëmijëve, pas një seri akuzash dhe tensioneve në familje.
Në fund të vitit 2022, sipas bashkëshortit të së ndjerës, tensionet mes tyre u rritën pas lindjes së fëmijës së fundit, dhe situata përkeqësohej me akuza për lidhje jashtëmartesore.
“Ajo filloi të më akuzonte padrejtësisht për lidhje jashtëmartesore. Arriti deri aty sa më shkatërroi celularin dhe më bëri të humbas klientët. Ajo filloi të telefononte njërën prej tyre duke thënë se ne ishim të dashuruar dhe derisa burri i saj më telefonoi duke më thënë të mos punonim më”, ka thënë ai.
Sipas avokatit mbrojtës së bashkëshortit të shqiptares, ardhja e kunatës së tij kishte përkeqësuar krizën mes të dyve.
“Në vend që të bënte paqe mes tyre, ajo nxiti tensione deri në agresion fizik nga ana e të dyve”, ka thënë avokati i tij.
Po ashtu, mediat italiane shkruajnë se burri u arrestua për një ditë në vitin 2023, sepse i kishte mbyllur dy motrat në shtëpi dhe kishte shkuar në xhami. Për atë episod, ai u dënua me disa muaj.
Si ka ndodhur ngjarja?
Personi i parë që ra nga dritarja ishte gruaja 32-vjeçare. Fqinjët kishin dëgjuar një zhurmë dhe rënkime dhe kishin lajmëruar policinë. Ndërkohë kishin parë motrën e tyre në parvaz dhe i bërtitën që të mos hidhej, por edhe ajo u hodh.
Tani ajo është e shtruar në spitalin e San Martinos me dëmtime të rënda. Mësohet se kur mbërriti policia, katër fëmijët e 32-vjeçares ishin në shtëpi dhe se banesa ka qenë e mbyllur nga brenda, por kanë qenë fëmijët ata që e kanë hapur.