Pas 1 ore brenda në SPAK, gazetarët e kronikës Artan Hoxha dhe Elton Qyno kanë dalë nga ambientet e Prokurorisë së Posaçme.
Dy gazetarët u paraqitën ditën e sotme në ambientet e Prokurorisë së Posaçme Kundër Korrupsionit dhe Krimit të Organizuar, pas operacionit të SPAK në Elbasan.
Gjykata vendosi ndaj tyre masën e sigurisë “detyrim paraqitje”.
Bëhet me dije se mbi gazetarin Hoxha rëndon akuza “anëtar i organizatës kriminale”. Më herët, për të u kërkua masa e “arrestit shtëpiak”. Ndërsa gazetari Elton Qyno akuzohet për korrupsion. Ndaj tij është vendosur masa “detyrim paraqitje”.
Dy gazetarët qëndruan në ambientet e prokurorisë së posaçme për rreth 60 minuta.
Ajo që u vu re është se Hoxha dhe Qyno dolën nga dyert e SPAK duke mbajtur disa dosje dhe një çantë që besohet se janë detaje të dosjes gjyqësore.
Megjithatë, para se të futeshin në SPAK, ata pohuan se iu ishte bërë një kontroll në banesa gjatë ditës dhe iu ishin sekuestruar telefonat celularë. “S’na kanë arrestuar akoma”, dëgjohet të thotë Hoxha.