Sirenat paralajmëruese janë aktivizuar mëngjesin e sotëm në qendër të Tel Avivit dhe në Gush Dan, pak pas orës 5.30 të mëngjesit me orën tonë, për shkak të lëshimit të një rakete tokë-tokë nga Libani. Sipas mediave ndërkombëtare raketa u kap dhe shkollat do të hapen normalisht sot.
Kjo është hera e parë që Hezbollahu ka vënë në shënjestër Tel Avivin që kur filloi të sulmonte me raketa Izraelin pas 7 tetorit.
Raketat prekën vende të tjera në Izraelin qendror: Gush Dan, Ramat Gan, Tolemy Elazar dhe Mensha. Për momentin nuk ka rënë bombë.
Ndërkohë, Izraeli filloi ditën e tretë të sulmeve në Libanin jugor të mërkurën, disa orë pasi Hezbollah konfirmoi vdekjen e një komandanti të lartë në një sulm ajror në Bejrut dhe një ministër libanez tha se vetëm Uashingtoni mund të ndihmojë në përfundimin e luftimeve.
Mediat libaneze raportuan se sulmet ajrore izraelite kishin shënjestruar disa zona në jug të vendit, nga ora 5 e mëngjesit, duke shkaktuar viktima të paspecifikuara.
Më herët të mërkurën, Hezbollah konfirmoi se komandanti i lartë Ibrahim Qubaisi ishte në mesin e gjashtë personave të vrarë nga një sulm ajror izraelit në një bllok apartamentesh në kryeqytetin libanez Bejrut të martën, siç kishte pretenduar Izraeli më parë. Izraeli tha se Qubaisi drejtonte forcën raketore të grupit.
Ofensiva e Izraelit që nga mëngjesi i së hënës ka vrarë 569 njerëz, duke përfshirë 50 fëmijë, dhe ka plagosur 1,835 në Liban, tha ministri i shëndetësisë Firass Abiad për Al Jazeera Mubasher TV. Sulmet e së martës erdhën pasi breshëritë e së hënës arritën numrin më të lartë të vdekjeve në çdo ditë të vetme në Liban që nga lufta civile 15-vjeçare që filloi në 1975.
Ofensiva e re e Izraelit kundër Hezbollahut ka ngjallur frikën se konflikti gati një vjeçar midis Izraelit dhe grupit militant palestinez Hamas në Gaza po përshkallëzohet dhe mund të destabilizojë Lindjen e Mesme.
/a.r