Shkencëtarët kinezë po përpiqen të sigurojnë funksionimin e qetë dhe të sigurt të një hekurudhe me shpejtësi të lartë në shkretëtirën e Gobit, duke kuptuar më mirë lëvizjen e rërës.
Ata kanë bërë përparim në zbulimin e lëvizjes së sedimentit nga erërat e forta përgjatë hekurudhës me shpejtësi të lartë Lanzhou-Xinjiang në Kinën veriperëndimore, njoftoi Instituti Veriperëndimor i Eko-Mjedisit dhe Burimeve i Akademisë së Shkencave Kineze.
“Studimi ka një rëndësi praktike për funksionimin e sigurt të linjës dhe mund të shërbejë si një bazë teorike për parandalimin dhe menaxhimin e fatkeqësive të shkaktuara nga erërat”,- tha Liu Benli, studiues në institut, shkruan “China Daily”.
Hekurudha me shpejtësi të lartë prej 1776 kilometrash lidh Urumqi, kryeqendra e rajonit autonom të Xinjiang Ujgur, me Lanzhou, kryeqendra e provincës Gansu.
Erërat e forta që fryjnë mbi Gobin e gjerë mund të shkaktojnë probleme të rëndësishme mjedisore dhe dëmtime në infrastrukturë, por Liu tha se kuptimi shkencor i mekanizmave dhe dinamikave themelore të procesit mbetet i kufizuar.
Studiuesit e institutit zgjodhën një zonë me erë përgjatë hekurudhës për të kryer vëzhgime në terren. Wang Tao, një studiues i asociuar në institut, tha se studimi propozon sugjerime për përmirësimin e sistemit të mbrojtjes së hekurudhës.
Rezultatet e studimit janë publikuar në revistën “Land Degradation & Development”.