Të hënën në orën 15.00 në zyrat e kryesisë së Kuvendit është thirrur Konferenca e Kryetarëve të grupeve parlamentare. Dokumentet zyrtare bëjnë të ditur se në mbledhjen që drejtohet nga Lindita Nikolla do të shqyrtohet kërkesa e grupit parlamentar të Partisë Demokratike për mocion me debat parlamentar mbi çështjen e prodhimit, shitjes dhe trafikimit të lëndëve narkotike në vendin tonë.
Burimet nga opozita thanë për RTSH se pakica parlamentare kërkon në Kuvend një debat politik për një nga temat më të nxehta, siç është trafikimi i narkotikëve që shpesh është bërë burim edhe për akuza ndaj piramidës më të lartë shtetërore.
Dy javët e fundit një nga ngjarjet që është risjellë në vëmendje nga Gazmend Bardhi është ajo e laboratorit të kokainës, në sfondin e të cilës deputeti demokrat thotë se qëndrojnë edhe lidhjet familjare të kryeministrit të vendit.
Që pas kthimit të opozitës në jetën normale parlamentare Konferenca e Kryetareve është mbledhur më shpesh se në të kaluarën. Konferenca përbëhet nga 10 anëtarë me numër të barabartë mes shumicës dhe pakicës. Në rastet kur në konference nuk ka dakordësi, atëherë vendos salla e parlamentit.
/a.r