4.5 C
Tirana
Thursday, 28 October, 2021

SHBA, bisedime të fshehta me Shqipërinë dhe Kosovën për strehimin e afganëve

Administrata e Presidentit amerikan, Joe Biden, ka zhvilluar bisedime sekrete me më shumë vende se sa është bërë publike në një përpjekje të dëshpëruar për të siguruar një strehim të përkohshëm për afganët të cilët kanë punuar për qeverinë amerikane. Kështu shkruan Reuters këtë të premte, ku ndër të tjera sipas burimeve të kësaj mediaje, qeveria amerikane ka zhvilluar bisedime sekrete edhe me Shqipërinë dhe Kosovën.

Reuters thotë se SHBA-ja ka ofruar përfitime ekonomike dhe politike për Kosovën që të marrë disa mijëra afganë, por në Uashington ka shqetësime rreth aftësisë së këtij vendi për të mbajtur afganët. Ministria e Jashtme e Kosovës nuk ka komentuar çështjen. Edhe ambasadat e Shqipërisë, Kazakistanit, Taxhikistanit dhe Uzbekistanit nuk kanë komentuar.

“Bisedimet sekrete me vende si Kosova dhe Shqipëria nënvizojnë dëshirën e administratës për të mbrojtur afganët e lidhur me SHBA-në nga ndëshkimet e talebanëve derisa të plotësojnë procesin e aprovimit për vizë amerikane”, shkruan Reuters.

Talebanët janë duke shtuar kontrollin e tyre në Afganistan. Kjo bëri që SHBA-ja të dërgojë personel shtesë në Katar për të përshpejtuar procesin e aplikimit për Vizë Speciale për Emigrant (SIV). Afganët që kanë shërbyer si përkthyes për qeverinë amerikane dhe punë të tjera mund të aplikojnë për programin e emigracionit. Deri më tani në SHBA janë evakuuar 1200 afganë dhe ky numër pritet që të rritet në 3500 në javën e ardhshme.

Të frikësuar se avancimi i talebanëve po rrezikon aplikuesit për vizën SIV, Uashingtoni ka kërkuar vende të treta që t’i mirëpresë derisa të plotësohet dokumentacioni i duhur dhe ata të mund të udhëtojnë drejt Shteteve të Bashkuara. “Është me të vërtetë shqetësuese se nuk ka asnjë plan konkret për të evakuuar aleatët të cilët janë në rrezik. Është befasuese pse administrata ka marrë kaq shumë kohë për të siguruar këto marrëveshje,” tha Krish O’Mara Vignarajah, presidente e organizatës për zhvendosjen e emigrantëve dhe refugjatëve.

Dy zyrtarë të lartë, të cilët kanë kërkuar anomitet, kanë deklaruar për Reuters, “se shtetet kanë hezituar në marrjen e afganëve për shkak të shqetësime rreth verifikimit  të sigurisë së tyre dhe kontrollit shëndetësor për Covid-19 përpara se të lejoheshin të fluturonin”. Administrata e Biden ka parë mundësinë që mijëra aplikues t’i dërgojë edhe në KazakistanTaxhikistan dhe Uzbekistan, por është bërë pak progres në këtë drejtim.

“Ka shqetësime të pritshme: Kush janë këta njerëz? Si i njihni këta njerëz? Mund ta siguroni që këta njerëz do të marrinë vizë për në SHBA? Kush do të kujdeset dhe kush do t’i ushqejë këta njerëz? Çfarë ndodh nëse këta persona dalin nga ndërtesa ku duhet të qëndrojnë”, tha një zyrtar i lartë i Departamentit të Shtetit.

Megjithatë ky zyrtar nuk e konfirmoi se me cilat vende po bisedon SHBA-ja. Reuters shkruan se një marrëveshje për të marrë rreth 8 000 emigrantë në Katar ka qenë shumë pranë nënshkrimit, por nuk është shpallur ende zyrtarisht. Zyrtarët paralajmërojnë se ritmi i çdo marrëveshjeje të mundshme mund të pengohet nga situata në Afganistan që ndryshon me shpejtësi. Ngurrimi i disa vendeve ka bërë që administrata të apelojë tek disa vende të tjera që mund të jenë të gatshme ta ndihmojnë nëse Uashingtoni jep një ndihmë, thanë zyrtarët.

1200 afganët e evakuuar deri më tani janë vetëm një fraksion prej 21 000 personash që bëjnë pjesë e programit për viza dhe që administrata e Biden po vuan për t’u gjetur një strehim të përkohshëm. Ekspertët përllogarisin që numri i të evakuuarve të shkojë rreth 50 000 deri në 80 000 kur të përfshihen edhe familjarët e afganëve të riskuar.

Drejtuesi i bordit të No One Left Behind, James Miervaldis, një organizatë që po ndihmon aplikuesit e SIV për të shkuar në SHBA, tha se ka shumë pak mundësi që këta aplikantë të evakuohen. “Matematika dhe afati nuk ngjisin. Këta njerëz nuk do të kenë mundësinë që të largohen”, tha Miervaldis.

Kjo çështje shikohet me shqetësim edhe nga ligjvënës të tjerë në Kongres duke përfshirë edhe aleatët e Biden. “Duhet që të përmbushim premtimet tona për mijëra afganë që rrezikuan jetën për të na ndihmuar ne”, tha kongresmenia demokrate Sara Jacobs.

TË NGJASHME

TË FUNDIT

WP2Social Auto Publish Powered By : XYZScripts.com