4.5 C
Tirana
Thursday, 28 October, 2021

Kim: PD nuk mund të bëjë përpara nëse një këmbë e ka në të shkuarën

Ambasadorja amerikane Yuri Kim deklaroi këtë të premte nga selia blu, aty ku kishte një takim me kryetarin Lulzim Basha, se PD duhet të jetë më e fortë dhe më e bashkuar për të bërë përpara në veprimet për të siguruar zgjedhje të ardhshme më të mira. E teksa identifikoi dy çështje kryesore, ajo për reformën territoriale dhe korrupsionin, Kim tha se PD mund të bëjë përpara duke shikuar nga e ardhmja dhe jo nëse i ka mbetur një këmbë në të shkuarën.

“Pozita jonë sa i përket pavarësisë, sovranitetit dhe demokracisë së Shqipërisë nuk ka për të ndryshuar. Pozita jonë për PD nuk ka për të ndryshuar. Mbetet shumë punë për t’u bërë në vijim. Është thelbësore dhe është e shkëlqyer që PD është rikthyer në Kuvend plotësisht. Ka veprime që duhen ndërmarrë për të siguruar që do të keni zgjedhje më të mira herën e ardhshme, për të trajtuar të gjitha mangësitë që janë identifikuar në raportin e ODIHR. Ka punë që duhet bërë sa i përket reformës territoriale dhe punë që duhen bërë kundër korrupsionit. E gjithë kjo kërkon që të ketë një PD që është e fortë dhe e bashkuar që mund të bëjë përpara, por nuk mund të bëjë përpara nëse një këmbë ka mbetur në të shkuarën. Si gjithmonë presim që të ecim përpara me Shqipërinë, popullin e Shqipërisë, PD-në drejt të ardhmes. Kështu që le të ecim përpara”.

Kim tregoi edhe se çfarë ka biseduar me kryedemokratin Basha. Ajo u shpreh se SHBA e kupton që PD ndodhet në një proces të vështirë dhe tranzicioni, por shtoi se Uashingtoni mbetet e angazhuar për të punuar ngushtësisht me ta.

“Ndava me kryetarin Basha që Uashingtoni mbetet i angazhuar për të vazhduar për të punuar më ngushtësisht me PD. Sikurse dinë të gjithë, qeveria e SHBA ka pasur një marrëdhënie shumë të fortë me PD qysh prej fillimit të saj. Ne ishim aty kur PD hipi në pushtet për herë të parë dhe shpresojmë që të punojmë së bashku kur ajo të vijë në pushtet përsëri. Demokracia përkufizohet nga të pasurit e një partie opozitare të fortë dhe që lulëzon. Gjithashtu e kuptojmë fare mirë se PD ndodhet në një pozitë të vështirë, është në proces tranzicioni, por shpresojmë që të mund të dalë më e fortë dhe më e bashkuar dhe që të dalë në pozitë që të fitojë përsëri zgjedhjet”.

Ky ishte takimi i parë i Kim dhe Bashës pas përjashtimit të Sali Berishës nga grupi parlamentar.

TË NGJASHME

TË FUNDIT

WP2Social Auto Publish Powered By : XYZScripts.com