“Duhet t’iu tregojmë shqiptarëve të korruptuarit”, Basha fton deputetët të votojnë ligjin e vetingut për pastrimin

Kryetari i Partisë Demokratike Lulzim Basha deklaroi sot përmes një komunikimi në rrjetet sociale se politikanët shqiptarë duhet t’i nënshtrohen vetting-ut në të njëjtën mënyrë si prokurorët dhe gjyqtarët.

Sipas Bashës nuk ka më asnjë alibi dhe çdo deputeti i Parlamentit duhet të shprehet përmes votës për ligjin e vettingut të politikanëve.

Basha tha se projektligji i propotuar prej tij parashikon ristrukturimin e ILDKP-së, duke i dhënë kompetenca të reja që në bashkëpunim me SPAK dhe BKH-në të kryejnë verifikime ndaj politikanëve.

Deklarata e Bashës:

Sot kam depozituar në Kuvendin e Shqipërisë projektligjin për vettingun e politikanëve. Ashtu siç e pata njoftuar para disa javësh, grupi i punës në PD, jursitët më të mirë që kemi kanë bërë gati një projektligj që mundëson kontrollin e detajuar të pasurisë së çdo politikani të rrethit të tij familjar apo shoqëror, si dhe lidhjet e papërshtatshme apo thënë ndryshe bashkëpunimin e një politikani me krimin e organizuar.

Dy janë parimet që zbatohen në këtë projekt-ligj. I pari: Ndiq paranë, pra paraja e korrupsionit, paraja e politikanit të korruptuar e fshehur në çfarëdo forme, gjurmohet përmes instrumentave që jepen autoritetit për luftën kundër korrupsionit, thënë ndryshe një ILDKP e reformuar dhe e fuqizuar. Dhe së dyti sa i takon lidhjeve kriminale, i jepen kopetenca të njëjtit autoritet që në bashkëpunim me SPAK-un me BKH-në me shërbimet inteligjente të vërtetojnë nëse një politikan gënjen apo thotë të vërtetën kur deklaron çdo vit me detyrim se nuk ka kontakte të papërshtatshme, thënë ndryshe kontakte me botën e krimit të organizuar. Ky është një model që është në përputhje totale me Kushtetutën e Shqipërisë, me kartën europiane të të drejtave të njeriut, por në të njëjtën kohë mundëson që politikanët shqiptarë t’i nënshtrohen të njëjtit kontroll të cilit i nënshtrohen sot magjistratët, prokurorët, por po kështu dhe punonjësit e policisë dhe gardës së Republikës.

Projekt-ligji është depozituar, nuk ka më asnjë alibi. Tani është momenti që përmes votës së tyre, çdo deputet i Kuvendit të Shqipërisë të shprehet dhe të mos fshihet dhe përmes votës së ligjit të vettingut të politikanëve t’i tregojmë shqiptarëve se kush janë politkanët e korruptuar që duhet të largohen dhe të lënë mandatin e tyre, kush janë politikanët e lidhur me krimin që nuk munden më të qëndrojnë se mbrojnë interesat e publikut kur në fakt promovojnë interesat e atyre që i kanë sjellë dhe të pastrojmë politikën duke i dhënë Shqipërisë dhe shqiptarëve një politikë të pastër nga korrupsioni dhe nga lidhjet me krimin e organizuar.